jo nikli dil se pahunchi la-makan tak

jo niklī dil se pahūñchī lā-makāñ tak

ga.ī āh-e-rasā dekho kahāñ tak

sitam-kash haiñ balā ke o sitam-gar

sitam Dhā.egā tū un par kahāñ tak

vo armāñ the ki ham dil se na nikle

vo matlab the na aa.e jo zabāñ tak

tirī ulfat meñ ākHir jaañ tak dī

uThāte sadma-e-hijrāñ kahāñ tak

na ham hoñge na hogā hijr kā ġham

ye sab jhagḌe haiñ jān-e-nā-tavāñ tak

makīñ kaisā makāñ tak ko na paayā

tasavvur ban ke DhūñDhā lā-makāñ tak

karūñ ai ramz 'arz-e-mudda'ā kyā

'ayāñ hai yaar par rāz-e-nihāñ tak

jo nikli dil se pahunchi la-makan tak

gai aah-e-rasa dekho kahan tak

sitam-kash hain bala ke o sitam-gar

sitam Dhaega tu un par kahan tak

wo arman the ki hum dil se na nikle

wo matlab the na aae jo zaban tak

teri ulfat mein aakHir jaan tak di

uThate sadma-e-hijran kahan tak

na hum honge na hoga hijr ka gham

ye sab jhagDe hain jaan-e-na-tawan tak

makin kaisa makan tak ko na paya

tasawwur ban ke DhunDha la-makan tak

karun ai ramz 'arz-e-mudda'a kya

'ayan hai yar par raaz-e-nihan tak