aaj kyun nala mera aatish-fishan hota nahin

aaj kyuuñ naala mirā ātish-fishāñ hotā nahīñ

shikva-sanj-e-dost fariyād-e-zabāñ hotā nahīñ

nāma-bar se mudda.ā shāyad bayāñ hotā nahīñ

jo javāb-e-yār mujh tak armuġhāñ hotā nahīñ

kyā huā nā-mehrbāñ hai mehrbāñ ho jā.egā

mujh ko be-mehrī kā us par bad-gumāñ hotā nahīñ

ta.ana-zan nāseh na ho tū mujh ko uryāñ dekh kar

āshiq-e-shorīda rusvā-e-jahāñ hotā nahīñ

bad-gumānī hai mirī vo ġhair par hai mehrbāñ

aisā kāfir dil kisī par mehrbāñ hotā nahīñ

tafraqa ulfat meñ ho phir kyā khule qadr-e-vafā

be mile donoñ diloñ ke imtihāñ hotā nahīñ

yaad thī jitnī ḳhushāmad ham ne vo bhī sarf kī

phir bhī raazī ham se us kā pāsbāñ hotā nahīñ

vaz.a be-mehrī kī chhoḌo aib lagtā hai tumheñ

mehrbāñ ho kar koī nā-mehrbāñ hotā nahīñ

vahm hai yā saham hai qātil ko yā merā ḳhayāl

haath kāñpe jaate haiñ ḳhanjar ravāñ hotā nahīñ

zā.iqa 'rāqim' nahīñ aatā firāq-e-yār kā

kuchh rag-o-pai meñ lahū jab tak ravāñ hotā nahīñ

aaj kyun nala mera aatish-fishan hota nahin

shikwa-sanj-e-dost fariyaad-e-zaban hota nahin

nama-bar se muddaa shayad bayan hota nahin

jo jawab-e-yar mujh tak armughan hota nahin

kya hua na-mehrban hai mehrban ho jaega

mujh ko be-mehri ka us par bad-guman hota nahin

tana-zan naseh na ho tu mujh ko uryan dekh kar

aashiq-e-shorida ruswa-e-jahan hota nahin

bad-gumani hai meri wo ghair par hai mehrban

aisa kafir dil kisi par mehrban hota nahin

tafraqa ulfat mein ho phir kya khule qadr-e-wafa

be mile donon dilon ke imtihan hota nahin

yaad thi jitni KHushamad hum ne wo bhi sarf ki

phir bhi raazi hum se us ka pasban hota nahin

waza be-mehri ki chhoDo aib lagta hai tumhein

mehrban ho kar koi na-mehrban hota nahin

wahm hai ya saham hai qatil ko ya mera KHayal

hath kanpe jate hain KHanjar rawan hota nahin

zaiqa 'raqim' nahin aata firaq-e-yar ka

kuchh rag-o-pai mein lahu jab tak rawan hota nahin