mere arman nikalne de abhi sone de jaanan ko

mire armāñ nikalne de abhī sone de jānāñ ko

sabā dāman se roke rah nigāh-e-sub.h-e-hijrāñ ko

kiyā TukḌe hai āḳhir dast-e-vahshat ne garebāñ ko

chhupā rakhā thā is parda meñ ham ne rāz-e-pinhāñ ko

kuchh aise ho ga.e avval hī be-ḳhud ishq meñ ham to

nahīñ jaanā garebāñ ko na samjhā ham ne dāmāñ ko

na us meñ husn yūsuf sā na ra.anā.ī zuleḳhā sī

fusūñ kuchh yaad hai aisā ki le letā hai īmāñ ko

yahāñ iġhmāz tum kar lo vahāñ dekheñge mahshar meñ

chhuḌānā ġhair se dāman ko aur mujh se garebāñ ko

yahīñ se hashr ulTegā yahīñ hogī qayāmat bhī

samajh rakhā hai kyuuñ chhoḌeñ zamīn-e-kū-e-jānāñ ko

mujhe tum dekhte ho aur us hasrat se maiñ tum ko

ki bulbul rū-e-gul ko aur gul bulbul ke armāñ ko

jahāñ meñ ḳhāna-zād-e-zulf ko kyā chhoḌ dete haiñ

ki tum ne chhoḌ rakhā mujh asīr-e-zulf-pechāñ ko

mere siina par tum baiTho galā talvār se kaaTo

ḳhat-e-taqdīr maiñ samjhūñ ḳhat-e-shamshīr-e-burrāñ ko

asīrī ham ko achchhī thī ki aalam thā tamāshā.ī

bahut ham yaad karte haiñ takalluf-hā-e-zindāñ ko

na chhoḌo dosh par gesū bharam khultā hai gesū kā

paḌegā tum ko kam karnā mirī shahbā-e-hijrāñ ko

mohabbat us ko kahte haiñ ki thī sahrā-o-majnūñ meñ

na sahrā ne use chhoḌā na majnūñ ne bayābāñ ko

visāl-e-yār jab hogā milā degī kabhī qismat

tabī.at meñ tabī.at ko dil-o-jāñ meñ dil-o-jāñ ko

miTāyā us ne kis kis ko burā ho is mohabbat kā

zuleḳhā kī zuleḳhā.ī ko lailā kī shabistāñ ko

zabāñ se kyuuñ kareñ apnī satā.ish aap ham 'rāqim'

suḳhan-dāñ jāñch leñge ḳhud nigāhoñ meñ suḳhan-dāñ ko

mere arman nikalne de abhi sone de jaanan ko

saba daman se roke rah nigah-e-subh-e-hijran ko

kiya TukDe hai aaKHir dast-e-wahshat ne gareban ko

chhupa rakha tha is parda mein hum ne raaz-e-pinhan ko

kuchh aise ho gae awwal hi be-KHud ishq mein hum to

nahin jaana gareban ko na samjha hum ne daman ko

na us mein husn yusuf sa na ranai zuleKHa si

fusun kuchh yaad hai aisa ki le leta hai iman ko

yahan ighmaz tum kar lo wahan dekhenge mahshar mein

chhuDana ghair se daman ko aur mujh se gareban ko

yahin se hashr ulTega yahin hogi qayamat bhi

samajh rakha hai kyun chhoDen zamin-e-ku-e-jaanan ko

mujhe tum dekhte ho aur us hasrat se main tum ko

ki bulbul ru-e-gul ko aur gul bulbul ke arman ko

jahan mein KHana-zad-e-zulf ko kya chhoD dete hain

ki tum ne chhoD rakha mujh asir-e-zulf-pechan ko

mere sina par tum baiTho gala talwar se kaTo

KHat-e-taqdir main samjhun KHat-e-shamshir-e-burran ko

asiri hum ko achchhi thi ki aalam tha tamashai

bahut hum yaad karte hain takalluf-ha-e-zindan ko

na chhoDo dosh par gesu bharam khulta hai gesu ka

paDega tum ko kam karna meri shahba-e-hijran ko

mohabbat us ko kahte hain ki thi sahra-o-majnun mein

na sahra ne use chhoDa na majnun ne bayaban ko

visal-e-yar jab hoga mila degi kabhi qismat

tabiat mein tabiat ko dil-o-jaan mein dil-o-jaan ko

miTaya us ne kis kis ko bura ho is mohabbat ka

zuleKHa ki zuleKHai ko laila ki shabistan ko

zaban se kyun karen apni sataish aap hum 'raqim'

suKHan-dan jaanch lenge KHud nigahon mein suKHan-dan ko