KHata ki ai dil-e-nadan KHata ki

ḳhatā kī ai dil-e-nādāñ ḳhatā kī

tamannā kī to kis nā-āshnā kī

ḳhudā kī shaan ye qismat hinā kī

banī mashshāta us ke dast-o-pā kī

batā kar shoḳhiyāñ us ko adā kī

Duboī ham ne qismat mudda.ā kī

bayāñ sun kar mirā jalte haiñ shāhid

zabāñ meñ merī garmī hai balā kī

firāq-e-yār se ghuTne lagā dam

duhā.ī hai duhā.ī hai ḳhudā kī

mirā va.ada raqīboñ se vafā ho

huī tāsīr kyā ulTī duā kī

ka.ī din se vo ghabrā.e hue haiñ

rasā.ī kuchh huī āh-e-rasā kī

na kahte mudda.ā naḳhvat na hotī

ye ḳhūbī hai hamārī iltijā kī

hue ham ḳhaak bhī us rahguzar meñ

rahī hasrat hī vasl-e-naqsh-e-pā kī

vaqār-e-iltijā bhī ham ne khoyā

abas jā jā ke un se iltijā kī

ummīdeñ apnī sab qāyam raheñgī

agar vo haiñ ḳhudā.ī meñ ḳhudā kī

yahāñ to ho chukī 'rāqim' mulāqāt

tavaqqo.a baaqī hai roz-e-jazā kī

KHata ki ai dil-e-nadan KHata ki

tamanna ki to kis na-ashna ki

KHuda ki shan ye qismat hina ki

bani mashshata us ke dast-o-pa ki

bata kar shoKHiyan us ko ada ki

Duboi hum ne qismat muddaa ki

bayan sun kar mera jalte hain shahid

zaban mein meri garmi hai bala ki

firaq-e-yar se ghuTne laga dam

duhai hai duhai hai KHuda ki

mera wada raqibon se wafa ho

hui tasir kya ulTi dua ki

kai din se wo ghabrae hue hain

rasai kuchh hui aah-e-rasa ki

na kahte muddaa naKHwat na hoti

ye KHubi hai hamari iltija ki

hue hum KHak bhi us rahguzar mein

rahi hasrat hi wasl-e-naqsh-e-pa ki

waqar-e-iltija bhi hum ne khoya

abas ja ja ke un se iltija ki

ummiden apni sab qayam rahengi

agar wo hain KHudai mein KHuda ki

yahan to ho chuki 'raqim' mulaqat

tawaqqoa baqi hai roz-e-jaza ki