giran hain unki KHatar par zaban ki shoKHiyan meri

girāñ haiñ un kī ḳhātir par zabāñ kī shoḳhiyāñ merī

ilāhī band ho jaaye shikāyat kī zabāñ merī

rahī taqrīr meñ uljhī tamannā.ī bayāñ merī

na maiñ samjhā nigahbāñ kī na samjhā pāsbāñ merī

taġhāful ne baḌhā dī un kī āhañg-e-fuġhāñ merī

na tāb-e-zabt hai mujh ko na thamtī hai zabāñ merī

na vo kuchh merī sunte haiñ na un kā pāsbāñ merī

kashākash meñ tamannā hai taraddud meñ hai jaañ merī

bayān-e-dard-āgīñ hai kahegā jā ke kyā qāsid

hadīs-e-ārzū merī pareshāñ dāstāñ merī

balā haiñ shoḳhiyāñ un meñ ham-āġhoshī meñ kyā hoñgī

tabassum par pisī jaatī hai jān-e-nā-tavāñ merī

sadā-e-halqa-e-zanjīr dar-e-dil meñ khaTaktī hai

koī aatā hai yā aa.ī hai marg-e-nā-gahāñ merī

yahāñ tak ab to shohrat hai merī betābī-e-dil kī

navāsanj-e-chaman kahte haiñ ġham kī dāstāñ merī

bharā hai mudda.ā dil meñ kahūñ dil khol kar un se

agar dam-bhar bhī ruk jaa.e ye chashm-e-ḳhūñ-fishāñ merī

ḳhabar thī tujh ko yārab us kī tūl-e-ahd-o-paimāñ kī

ḳhizar kī sī baḌhā denī thī umr-e-jāvedāñ merī

gayā furqat kā ronā saath ummīd-o-tamanna ke

vo betābī hai aglī sī na chashm-e-ḳhūñ-chakāñ merī

gila kā ab gila kaisā shikāyat kī shikāyat kyā

udhar badlā tumhārā dil idhar badlī zabāñ merī

ye ranjish duur ho jaatī kabhī tum baiTh kar sunte

mire ġham kā bayāñ mujh se zabānī dāstāñ merī

abas karte ho tum 'rāqim' mirī tadbīr milne kī

ham-āġhoshī muqaddar un se yaañ merī na vaañ merī

giran hain un ki KHatir par zaban ki shoKHiyan meri

ilahi band ho jaye shikayat ki zaban meri

rahi taqrir mein uljhi tamannai bayan meri

na main samjha nigahban ki na samjha pasban meri

taghaful ne baDha di un ki aahang-e-fughan meri

na tab-e-zabt hai mujh ko na thamti hai zaban meri

na wo kuchh meri sunte hain na un ka pasban meri

kashakash mein tamanna hai taraddud mein hai jaan meri

bayan-e-dard-agin hai kahega ja ke kya qasid

hadis-e-arzu meri pareshan dastan meri

bala hain shoKHiyan un mein ham-aghoshi mein kya hongi

tabassum par pisi jati hai jaan-e-na-tawan meri

sada-e-halqa-e-zanjir dar-e-dil mein khaTakti hai

koi aata hai ya aai hai marg-e-na-gahan meri

yahan tak ab to shohrat hai meri betabi-e-dil ki

nawasanj-e-chaman kahte hain gham ki dastan meri

bhara hai muddaa dil mein kahun dil khol kar un se

agar dam-bhar bhi ruk jae ye chashm-e-KHun-fishan meri

KHabar thi tujh ko yarab us ki tul-e-ahd-o-paiman ki

KHizar ki si baDha deni thi umr-e-jawedan meri

gaya furqat ka rona sath ummid-o-tamanna ke

wo betabi hai agli si na chashm-e-KHun-chakan meri

gila ka ab gila kaisa shikayat ki shikayat kya

udhar badla tumhaara dil idhar badli zaban meri

ye ranjish dur ho jati kabhi tum baiTh kar sunte

mere gham ka bayan mujh se zabani dastan meri

abas karte ho tum 'raqim' meri tadbir milne ki

ham-aghoshi muqaddar un se yan meri na wan meri