ترے رخ کی دلکشی ہے خم گیسوئے حسیں سے

ترے رخ کی دلکشی ہے خم گیسوئے حسیں سے

شب وروز کھیلتے ہیں ترے حسن دل نشیں سے

ترے جلوؤں کے نظارے تو ہزار بار دیکھے

کبھی سرحد گماں سے کبھی منزل حسیں سے

نہیں کاٹے کٹ رہی ہیں شبِ ہجر کی یہ گھڑیاں

کہ سحر الجھ گئی ہے کسی زلفِ عنبریں سے

نہ ملال ظرفِ ہستی نہ خیال مئے پرستی

میں شراب پی رہا ہوں تری چشم نازنیں سے

مرے دل کی اضطرابی نہ رضیؔ سکوں سے بدلی

کبھی جا کے دور دیکھا کبھی کی نظر قریں سے