جستجوئے شاہدِ مقصود ہے اے دل عبث

جستجوئے شاہدِ مقصود ہے اے دل عبث

توڑ کر جاں کو نہ کر توسعیِ لاحاصل عبث

تیغ ِابرو کے اشارے میں ہےکام اپنا تمام

تیز کرتا ہے چھری میرے لئے قاتل عبث

دسترس جب دامنِ قاتل تلک ممکن نہیں

ہاتھ پاؤں مارتاہے خوں میں اے بسمل عبث

اس کے کشتوں میں نہیں کرتا مجھے کوئی شمار

خوں لگا کر میں شہیدوں میں ہوا شامل عبث

حسنِ دو روزہ پہ ناحق ہے یہ صاحب کو غرور

اس قدر ہے نشۂ معجونِ آب وگل عبث

مرتبہ ایک جان و قالب کاہے داور سے مجھے

میرے اس کے بیچ میں ہے اب دوئی حائل عبث

ہاتھ دھوئے جان سے بیٹھے ہیں کوچے میں ترے

آستینوں کو چڑھا کر پھرتا ہے قاتل عبث

زہر ہی کھانا پڑا آخر فراقِ یار میں

سبزہ رنگوں پہ ہو اے رندؔتم مائل عبث