ہم نے مانا وہ کمر اہلِ نظر ملتی نہیں

ہم نے مانا وہ کمر اہلِ نظر ملتی نہیں

کوئی دکھلا دے دہن ہے گر کمر ملتی نہیں

کیا فقط بینش کو اے اہلِ نظر ملتی نہیں

واہمہ بھی ڈھونڈھتا ہے پر کمر ملتی نہیں

غیر ممکن ہے کہ بے صندل لگائے دور ہو

درد ِسر کی بھی دوا بے درد ِسر ملتی نہیں

وصل کی شب پھیردوں تیرے گلے پر ہائے ہائے

کیا کروں مجھ کو چھری مرغ ِسحر ملتی نہیں

جس کے پیچ وتاب سے کھائے رگ ِجاں پیچ تاب

کہتے ہیں شاعر مگر ایسی کمر ملتی نہیں

روز وشب کیونکر نہ سینے میں جلے مانند شمع

بتی مرہم کی پئے داغِ جگر ملتی نہیں

دل کے لگ جانے پہ ہے موقوف اپنی دیکھ بھال

دل نہیں ملتا کسی سے تو نظر ملتی نہیں

آنکھ بدلی کس لئے ایسے ہوئے بےدید کیوں

اپنے ہم چشموں سے بھی اب تو نظر ملتی نہیں

مقتضا تیری جہالت کا ہے لیتا ہے جو آڑ

روکے جو تیغِ قضا ایسی سپر ملتی نہیں

اس پری کو مال کی خواہش ہے میں مردِ فقیر

کیا کروں لوح ِطلسمِ گنجِ زرملتی نہیں

ہے دمِ آخر مرا سن لے وصیت آن کر

اتنی مہلت کیا تجھے او حیلہ گر ملتی نہیں

خاکپا اس غیرت خورشید کی چہرے پہ مل

تجھ کو داروئے کلف کیا او قمر ملتی نہیں

باندھوں پشتارہ گناہوں کا نہ کیونکر پیٹھ سے

بار برداری تو ہنگام ِسفر ملتی نہیں

سانس لینے کا کسے یارا ہے فرطِ ضعف سے

حال ِدل کچھ کہتے قدرت اس قدر ملتی نہیں

ہے بہ از صندل اگر ہاتھ آئے خاک ِپائے یار

سر پٹکتا ہوں دوائے دردِ سر ملتی نہیں

حسنِ حیرت زا سے تیرے پتلیاں پتھرا گئیں

اب پلک سے بھی پلک دو دوپہر ملتی نہیں

صبح لے جاتا ہے رقعہ شام کو لاتا ہے پھیر

یار کی ڈیوڑھی مجھے کیا نامہ بر ملتی نہیں

ہنستے ہنستے کھول دیتاہے اگر جوڑا کبھی

ایسی چھپ جاتی ہے بالوں میں کمر ملتی نہیں

رندؔ ہے سرکارِ عالی میں قدیمی جاں نثار

کب اسے خلعت میں شمشیر و سپر ملتی نہیں