زیست کے دن اپنے پورے کرچلے

زیست کے دن اپنے پورے کرچلے

تکتے تکتے راہ تیری مرچلے

ابرو و مژگاں کی الفت چھٹ چکی

اب چلے تلوار یا خنجر چلے

سحر بھولے جس کےآگے سامری

ایسے جادوگر پہ کیا منتر چلے

نقشِ پائے رفتگاں ہوں کیا نمود

سر کے بل اس کوچے میں اکثر چلے

آگے آگے ہم تھے راہ عشق میں

پیچھے پیچھے خضر پیغمبر چلے

دیکھیے منزل پہ پہنچیں کب تلک

شام سر پر آگئی دن بھر چلے

خاک اڑاتے سر پہ مثلِ گردباد

یوں چلے ہم جس طرح صرصر چلے

حیف ہے کی زندگانی نے دغا

آتے آتے موت کے ہم مر چلے

میرے اشکوں کا غضب طوفان ہے

ناؤ لے کر نوح پیغمبر چلے

ہیں رواں تارِ نظر پر یوں سرشک

ریسماں پر جیسے بازی گر چلے

کر عمل اے رندؔ قول ِدرد پر

جب تلک بس چل سکے ساغر چلے