زبانِ غیر سے جب نام تیرا جانِ جاں نکلا

زبانِ غیر سے جب نام تیرا جانِ جاں نکلا

لگی اِک آگ تلوؤں سے کہ بس سر سے دھواں نکلا

تباہی کو چمن کی دیکھتا کیوں کر اِن آنکھوں سے

ترے ہاتھوں سے گلچیں چھوڑ کر میں آشیاں نکلا

زمیں میں گڑ گیا خجلت سے تیرا سرو اے قمری

خراماں باغ میں جس دم مرا سروِ رواں نکلا

دل ِسوزاں کو میرے ساتھ اگر گاڑا لحد میں بھی

تو یارو دیکھ لینا قبر سے میری دھواں نکلا

نہ دیکھی سر زمیں ایسی نہ ہووے آسماں جس جا

مگر طبقہ زمینِ شعر کا بے آسماں نکلا

میں گدی کی طرف سے کھینچ کر تجھ کو نکالوں گا

کبھی تجھ سے جو راز ِعشق باہر اے زباں نکلا

نہ دکھلایا کسی دن بوند بھر پانی پسینے نے

ترا چاہِ ذقن اے جان ِجاں اندھا کنواں نکلا

دلا کس دشت پرآفت میں تنہا لے چلا مجھ کو

کبھی اس راہ سے ہوکر سلامت کارواں نکلا

بڑا رتبہ بیاں کرتے تھے حاجی سنگِ اسود کا

کیا تحقیق تو اس بت کا سنگِ آستاں نکلا

ترے عشاق کو پروانہ دیکھی قصر ِایواں کی

مقامِ بیدباغانِ محبت لا مکاں نکلا

جہاں تک ہو سکے تجھ سے ستم کر آسماں مجھ پر

زباں کو کاٹ ڈالوں گا جو حرف ِالاماں نکلا

خوشا طالع ترے اے پیر ِکنعاں واہ رے قسمت

کہ تیرے صلب کی دولت سے یوسف سا جواں نکلا

تنِ خاکی میں دیکھا روح کو تو اک مسافر ہے

گمان ِصاحبِ خانہ تھا جس پر میہماں نکلا

خلش موجود ہے سینے میں اس کے تیرِ مژگاں کی

جگر سے رندؔ کے عیسیٰ نفس کانٹا کہاں نکلا