مزدہ دل سے اٹھا جاتا ہے لطف زندگانی کا

مزدہ دل سے اٹھا جاتا ہے لطف زندگانی کا

مجھے پیری میں یاد آیا ہےجب عالم جوانی کا

برنگِ فصلِ گل مہمان ہے موسم جوانی کا

پلا ساقی کوئی ساغر شرابِ ارغوانی کا

گذشتہ سال تک حسنِ شباب ایسا نہ تھا اس کا

پھٹا پڑتا ہے جو بن اب یہ عالم ہے جوانی کا

حقیقت میں وہی ہے قول اب تک میں بھی شاہد ہوں

سنا تھا ذکر موسیٰ سے جو تیری لن ترانی کا

تری خلوت سرا جب سے بنایا خانۂ دل کو

دیا ہےدیدۂ حیراں کو عہدہ پاسبانی کا

کسی سے وقتِ خواب افسانۂ الفت نہ سننا تم

اڑا دیتی ہے نیند الٹا اثر ہے اس کہانی کا

ہنسی سے گالیاں دیتے ہو دو پر مجھ کو یہ ڈر ہے

غضب ہوگا اگر لپکا پڑے گا بد زبانی کا

قد بالا دکھانے اپنا وہ گلشن میں جاتے ہیں

ہوا ہے کاٹنا منظور سروِ بوستانی کا

رہا افسانۂ عشق و محبت ناتمام اب تک

کیا ہے خاتمہ بالخیر کس نے اس کہانی کا

بنی ہے شاخِ گل منبر چمن اک بزم ماتم ہے

ملا ہے بلبلِ نالاں کو عہدہ روضہ خوانی کا

جدا ہوتے نہیں ہیں لب سے لب خاموش بیٹھے ہیں

نتیجہ یہ ہوا حاصل ہمیں شیریں بیانی کا

دلِ مضطر کو فرقت میں بڑی تسکین ہووے گی

کمالِ مہر بانی ہے جو چھلا دو نشانی کا

پس از مدت جو آئی بھی طبیعت تو کہاں آئی

نہ پہنچے خط جہاں موقع نہ پیغامِ زبانی کا

عیادت کو وہ آئے تھے مگر ہم غش میں لپٹے تھے

نہ دیکھی ان کی صورت بھی برا ہونا توانی کا

ہوئے ہیں دست و پا بیکار رعبِ حسن سے یکسر

نظر آتا ہے نقشا اور کچھ نہ بہزاد و مانی کا

اسے حور و پری بتلاتے ہیں جو لوگ انساں ہیں

کہیں روحِ مجسم بھی لقب ہے میرے جانی کا

زباں قاصر ہے کیوں کر شکریہ اس کا ادا ہوگا

عنایت کا توجہ کی نظر کا مہربانی کا

فراقِ یار میں مذکور مے کا کیا ہے او ساقی

جلن تیزاب کی ہوتی جو پیتا گھونٹ پانی کا

گھلا کر میرے جسم زار کو اس کی جدائی میں

فراقِ یار نے پتلا بنایا نا توانی کا

جوانی تک مزہ تھا شاعری کا رندؔ سنتے ہو

بڑھاپا آ گیا گذرا زمانہ شعر خوانی کا