نگہباں خود اگر ہو جائے شیطانوں سے وابستہ

نگہباں خود اگر ہو جائے شیطانوں سے وابستہ

تو لازم خونِ انسانی ہو پیمانوں سے وابستہ

اگر تم سے حفاطت اس چمن کی ہو نہیں سکتی

تو جاؤ تم سبھی ہو جاؤ حیوانوں سے وابستہ

مرے گھر کی تباہی پر مرے ہمدم یہ کہتے ہیں

برا کیا تھا جو ہو جاتا یہ دربانوں سے وابستہ

بتا دوں آج میں تم کو سبب اپنی تباہی کا

حرم سے ہٹ گئے ہم ہو کے مے خانوں سے وابستہ

تمہارے واسطے ہرگز نہیں یہ رقص اور نغمے

مجاہد کا تو مستقبل ہے میدانوں سے وابستہ

حرم کے منبر ومحراب یہ کہتے ہیں اب تم سے

کہیں کر دو نہ تم مجھ کو بھی انسانوں سے وابستہ

ہماری خامشی کو بزدلی ہرگز نہ تم سمجھو

ہم اپنے حوصلے رکھتے ہیں طوفانوں سے وابستہ

برائے خدمتِ ملّی خدا را اب تو جڑ جاؤ

رہیں گے آپ تنہاؔ کب تک ایوانوں سے وابستہ