یار گر مطلوب ہے تو زحمتِ اغیار کھینچ

یار گر مطلوب ہے تو زحمتِ اغیار کھینچ

گل اگر مقصود ہے تو خار کا آزار کھینچ

دامن طفلاں ہے خالی سر میں ہے سودا بھرا

اے جنوں للہ سوئے دامنِ کہسار کھینچ

کون بے تابی میں لب تک کھینچ لائے گا تجھے

آہ کا مشکل ہے اب تو اے دلِ بیمار کھینچ

کم نہیں گر سنگ طفلاں سے ہوا سودا کا زور

ایک دن لے لوں گا سر پر دامنِ کہسار کھینچ

جیب و داماں کے تو پرزے اڑ چکے اگلے برس

دست وحشت جامۂ ہستی کا اب کے تار کھینچ

رخصتِ دیدار غیروں کو رہوں میں بے نصیب

دسترس پاؤں تو لوں میں دیدۂ اغیار کھینچ

کب تک آنکھوں میں رہے اس طرح بےخوابی کا روگ

چادر اپنے منھ سے بہر دیدۂ بیدار کھینچ

ہم زباں ہوگا جرس کا قافلے میں ہائے کون

یاں تو فرط ضعف سے نالوں کا ہے دشوار کھینچ

انگلیاں کیا لاکھوں سر کٹ جائیں گے اے جذب دل

لا تو یوسف کو مرے اک دن سرِ بازار کھینچ

روشنیِ چشم تجھ کو رکنؔ اگر منظور ہے

اپنی آنکھوں میں غبار کوچۂ دلدار کھینچ