فکر معاش یا غمِ روز جزا کرے

فکر معاش یا غمِ روز جزا کرے

دو دن کی زندگی میں بھلا کوئی کیا کرے

انسان جب کہ دیدۂ حق بیں کو وا کرے

اپنے ہی میں مشاہدہ نور خدا کرے

اس بے وفا سے خاک امید جواب ہو

جو بھول کر بھی خط نہ کسی کو لکھا کرے

سنتا ہے کون واعظ ناداں کی گفتگو

پاگل ہے جا کے کہہ دو وہ اپنی دوا کرے

نار سقر کا خوف ہو اس دل جلے کو کیا

جو آتشِ فراق میں ہر دم جلا کرے

میں دوں گا اس کو خوب ہی دنداں شکن جواب

دشمن جو مجھ پہ خندہ دنداں نما کرے

دل کی کشش سے بعد فنا میری خاک بھی

برباد ہو کے کوچۂ جاناں میں جا کرے

زلفِ صنم سے جس نے چھڑایا ہے دل مرا

شانہ سے اس کا ہاتھ الٰہی جدا کرے

دھوکھے میں آ کے دل تو اسے دے دیا ہے رکنؔ

ایسا نہ ہو کہ وہ بت پر فن دغا کرے