tumhaare aastan ka jo koi diwana kahlae

tumhāre āstāñ kā jo koī dīvāna kahlā.e

tum hī kah do vo duniyā ke liye kyuuñ Thokareñ khaa.e

zamāne se hameñ kyā hai hamārā mudda.ā tum ho

badalnā chāhtā hai ye zamāna to badal jaa.e

abhī to ham zamāne kī nazar meñ kuchh nahīñ lekin

ye mumkin hai hamāre ba.ad duniyā hosh meñ aa.e

koī majbūr hai kyuuñ aur kyuuñ muḳhtār hai koī

jahāñ vāloñ ko ye rāz-e-mashiyyat kaun samjhā.e

na jaane kyā banā detā ḳhayāl-e-mā-sivā mujh ko

bahut achchhā kiyā tum merī duniyā meñ chale aa.e

na jaane kis kī sūrat dekh kar aayā hai dīvāna

ke us ke ḳhair-maqdam ke liye dair-o-haram aa.e

hameñ bhī ik nazar jalva dikhā ai dāvar-e-mahshar

kalīm-o-tūr kā qissa kahāñ tak koī dohrā.e

balā ke ranj-o-ġham darpesh haiñ rāh-e-mohabbat meñ

hamārī manzil-e-dil tak hameñ allāh pahuñchā.e

terī ḳhātir hī us ne Thokareñ khā.īñ zamāne kī

tere dar se ab uTh kar terā dīvāna kahāñ jaa.e

abhī tak to ġhubār-ālūd hai ā.īna-e-hastī

jo chāheñ aap to ye ā.īna ā.īna ban jaa.e

mai-e-ishrat ke badle zahr-e-ġham thā apne sāġhar meñ

kuchh aise bhī hamārī ziist meñ lail-o-nahār aa.e

merā dil kah rahā hai us meñ koī raaz pinhāñ hai

dam-e-āḳhir ek aalam aa gayā hai vo nahīñ aa.e

faqīrī us kī sultānī se kam hotī nahīñ 'sādiq'

talab hote ho.e bhī haath jo apne na phailā.e

tumhaare aastan ka jo koi diwana kahlae

tum hi kah do wo duniya ke liye kyun Thokaren khae

zamane se hamein kya hai hamara muddaa tum ho

badalna chahta hai ye zamana to badal jae

abhi to hum zamane ki nazar mein kuchh nahin lekin

ye mumkin hai hamare baad duniya hosh mein aae

koi majbur hai kyun aur kyun muKHtar hai koi

jahan walon ko ye raaz-e-mashiyyat kaun samjhae

na jaane kya bana deta KHayal-e-ma-siwa mujh ko

bahut achchha kiya tum meri duniya mein chale aae

na jaane kis ki surat dekh kar aaya hai diwana

ke us ke KHair-maqdam ke liye dair-o-haram aae

hamein bhi ek nazar jalwa dikha ai dawar-e-mahshar

kalim-o-tur ka qissa kahan tak koi dohrae

bala ke ranj-o-gham darpesh hain rah-e-mohabbat mein

hamari manzil-e-dil tak hamein allah pahunchae

teri KHatir hi us ne Thokaren khain zamane ki

tere dar se ab uTh kar tera diwana kahan jae

abhi tak to ghubar-alud hai aaina-e-hasti

jo chahen aap to ye aaina aaina ban jae

mai-e-ishrat ke badle zahr-e-gham tha apne saghar mein

kuchh aise bhi hamari zist mein lail-o-nahaar aae

mera dil kah raha hai us mein koi raaz pinhan hai

dam-e-aKHir ek aalam aa gaya hai wo nahin aae

faqiri us ki sultani se kam hoti nahin 'sadiq'

talab hote hoe bhi hath jo apne na phailae