teri aankhon se pine ki jise bhi aarzu hogi

terī āñkhoñ se piine kī jise bhī aarzū hogī

mere saaqī use kyā hasrat-e-jām-o-subū hogī

terī hastī agar ḳhud bazm meñ ai sham.a-rū hogī

har ek dil ko fidā hone kī tujh par aarzū hogī

tasavvur meñ vo ā.eñge to puurī aarzū hogī

vo mere paas hoñge aur un se guftugū hogī

mazā to bandagī-e-ishq kā us vaqt aa.egā

tere naqsh-e-qadam hoñge jabīn-e-ārzū hogī

tumhīñ ko dekh kar ġhunche chaman meñ muskurāte haiñ

tumhāre ba.ad kis ko ehtiyāj-e-rañg-o-bū hogī

hamārā qissa-e-ġham sunte sunte Duub jā.eñge

shab-e-furqat sitāroñ se jab apnī guftugū hogī

ajal ke saath hī vo bhī agar tashrīf le aa.e

to phir ek ek nafas kī zindagī ko aarzū hogī

bahut nazdīk hai vo din ki jab duniyā ke hoñToñ par

merā afsāna hogā aur merī guftugū hogī

pas-e-murdan zamāna DhūñDtā hai marne vāloñ ko

hamāre ba.ad duniyā ko hamārī justujū hogī

jahāñ se bhī ham apnī dāstāñ chheḌeñge ai 'sādiq'

mohabbat ke hī unvāñ par hamārī guftugū hogī

teri aankhon se pine ki jise bhi aarzu hogi

mere saqi use kya hasrat-e-jam-o-subu hogi

teri hasti agar KHud bazm mein ai shama-ru hogi

har ek dil ko fida hone ki tujh par aarzu hogi

tasawwur mein wo aaenge to puri aarzu hogi

wo mere pas honge aur un se guftugu hogi

maza to bandagi-e-ishq ka us waqt aaega

tere naqsh-e-qadam honge jabin-e-arzu hogi

tumhin ko dekh kar ghunche chaman mein muskuraate hain

tumhaare baad kis ko ehtiyaj-e-rang-o-bu hogi

hamara qissa-e-gham sunte sunte Dub jaenge

shab-e-furqat sitaron se jab apnī guftugu hogi

ajal ke sath hi wo bhi agar tashrif le aae

to phir ek ek nafas ki zindagi ko aarzu hogi

bahut nazdik hai wo din ki jab duniya ke honTon par

mera afsana hoga aur meri guftugu hogi

pas-e-murdan zamana DhunDta hai marne walon ko

hamare baad duniya ko hamari justuju hogi

jahan se bhi hum apnī dastan chheDenge ai 'sadiq'

mohabbat ke hi unwan par hamari guftugu hogi