تیرا ستم نہیں تو قیامت ہے زندگی

تیرا ستم نہیں تو قیامت ہے زندگی

یعنی ترے ستم کی بدولت ہے زندگی

اے موت انتظار ہے اُس کا ذرا ٹھہر

جس جانِ آرزو کی امانت ہے زندگی

میں نے تو ہر نگاہ پہ کھایا ہے اک فریب

یہ کس نے کہہ دیا کہ حقیقت ہے زندگی

تم ہو نظر سے دور تو دوزخ سے کم نہیں

آ جاؤ تم فریب تو جنت ہے زندگی

اس انجمن میں جا کے ہمیں یہ پتہ چلا

بس اک نگاہِ ناز کی قیمت ہے زندگی

خالی رہے نہ کوئی نَفَس اُن کی یاد سے

گذرے جو اس طرح تو عبادت ہے زندگی

جس بے وفا کی یاد میں زندہ ہوں اے صباؔ

میرے لیے اسی کی محبت ہے زندگی