گر ہو امید وصل تو کوئی دعا کرے

گر ہو امید وصل تو کوئی دعا کرے

امید ہی نہیں ہو تو پھر کہیے کیا کرے

دل دے چکے ہیں جان بھی تم پر نثار ہے

اب تم سے پوچھتے ہیں کہو کوئی کیا کرے

میں ہوں وہ دلربا ہے تو غیروں کا اس میں کیا

قسمت میں جس کے لکھا ہو جلنا جلا کرے

کرتا ہے پاک خاک سے مشہور ہے مثل

جس کا بلند چاہے خدا مرتبہ کرے

میں نے کہا کہ دیکھیے مرتا ہوں سنئے تو

دیتے ہیں وہ جواب کہ بہتر خدا کرے

وعدہ کیا تو ہم سے وفا غیر سے کیا

اب ایسے چالیے کا کہو کوئی کیا کرے

میں نے تو صاف کہہ دیا سو میں ہزار میں

جس کو غرض ہو تجھ سے وہ تیری سنا کرے

سنتے ہیں اب رقیب بھی رہتے ہیں رات دن

میری بلا سے کوئی رہے کچھ ہوا کرے

کیسا یہ ظلم ہے کہ ابھی ہاں ابھی نہیں

کس بات پر تمہاری کوئی آسرا کرے

یوں مانگتا ہے دل شبِ فرقت دعائے وصل

جیسے فقیر پچھلی پہر کو صدا کرے

تم کو تو روز وعدوں پہ وعدہ ہے حشر تک

تھوڑی سی عمر میری کہاں تک وفا کرے