بزمِ ماتم میں وہ گل لایا ہے ساتھ اغیار کو

بزمِ ماتم میں وہ گل لایا ہے ساتھ اغیار کو

میرے پھولوں میں کیا ہے اس نے شامل خار کو

خفتگان خاک اٹھیں جان کر آوزار صور

گر سنیں اس شوخ کی پازیب کی جھنکار کو

مانع نظارہ ہے یہ چادر بارانِ اشک

دیکھوں میں اے چشم کیوں کر بزم میں دلدار کو

دیکھیے کس بے گنہ کا قتل ہے مدنظر

زیب تن کرتا ہے قاتل خنجر خونخوار کو

صبرؔ پھر آنے کو ہے فصلِ بہاری باغ میں

پھر مرا دل ڈھونڈھتا ہے دشت کو کہسار کو