یار جانے ہے بغل میں نام جس کا من ہرن

یار جانے ہے بغل میں نام جس کا من ہرن

کیا کسو سے کام اب تو لاگے ہے اس سے لگن

جب تلک دیکھا نہ تھا، تھا دل میں میرے وسوسہ

دور ہوں خطرے سے اب حاضر ہے میرا گل بدن

کوئی شے میں وہ نہیں پر اس سے سب ہے کائنات

ہے تو وہ بے مثل لیکن اس سے ہے روشن چمن

ہے تو وہ نقاش بھی اور مظہرِ بت آپ ہے

لے لیا تسبیح دے زنار کیا ہے برہمن

خوب ایسا ہے کہ جس سے صورتیں لاکھوں بنی

دیر ہے، کعبہ ہے، حق ہے، بت ہے، خود اور بت شکن

شاہ خیرالدین صادقؔ کی تو یہ اثبات ہے

جستجو گر یوں کرے کوئی آ ملے اس کو سخن