mohabbat ka rahega kya bhram jab hum nahin honge

mohabbat kā rahegā kyā bhram jab ham nahīñ hoñge

tamāsha ban ke rah jāygā ġham jab ham nahīñ hoñge

kise hogā yahāñ armān-e-ġham jab ham nahīñ hoñge

na hogā koī marhūn-e-sitam jab ham nahīñ hoñge

bahut pachhtā.eñge ahl-e-karam jab ham nahīñ hoñge

kise baḳhsheñge duniyā bhar ke ġham jab ham nahīñ hoñge

abhī to vaqt hai ham se vafāoñ kā sabaq le lo

vafā ho jā.egī duniyā meñ kam jab ham nahīñ hoñge

hamīñ se to mazāq-e-ishq kā me.aar qaa.im hai

na hogā koī afsāna raqam jab ham nahīñ hoñge

hamīñ se dāstān-e-sarmad-o-mansūr zinda hai

razā har sar karegā kaun ḳham jab ham nahīñ hoñge

hamāre ba.ad hañs kar zaḳhm dil par kaun khā.egā

chalegī kis pe phir teġh-e-sitam jab ham nahīñ hoñge

hamāre ba.ad ye hañgām-e-mahshar kaun dekhegā

banegā kaun tasvīr-e-alam jab ham nahīñ hoñge

hamīñ ne aap kī rāhoñ ko sajdoñ se sajāyā hai

na hoñge phir ye ādāb-e-haram jab ham nahīñ hoñge

hamāre ba.ad koī banda-e-bedām kyā hogā

dhare rah jā.eñge qaul-o-qasam jab ham nahīñ hoñge

hamārī zindagī dars-e-amal hai ahl-e-duniyā ko

na hogā phir kisī kā kuchh bhram jab ham nahīñ hoñge

kuchh aise naqsh apne ba.ad ham chhoḌeñge duniyā meñ

likheñge dāstāñ ahl-e-qalam jab ham nahīñ hoñge

zabān-e-ḳhalq par hogā hamāre ġham kā afsāna

jahāñ ko yaad phir ā.eñge ham jab ham nahīñ hoñge

hamārī ḳhāmushī meñ saikḌoñ asrār pinhāñ haiñ

hamahīñ ro.eñge arbāb-e-sitam jab ham nahīñ hoñge

hamārī zindagī hāmil hai asrār-e-mohabbat kī

mileñge kab amīn-e-dard-o-ġham jab ham nahīñ hoñge

hamīñ se pairvī mansūb hai ahl-e-mohabbat kī

na chūmegā koī naqsh-e-qadam jab ham nahīñ hoñge

hamīñ se hai ye qadr-o-manzilat shaiḳh-o-barhaman kī

na hogī hurmat-e-dair-o-haram jab ham nahīñ hoñge

hamāre ḳhalaq se qaa.em vaqār-e-ādamiyat hai

na hogī ādamiyat muġhtanim jab ham nahīñ hoñge

hamāre ba.ad mi'mār-e-mohabbat kaun āye.gā

na hogā phir zamāna yuuñ ba-ham jab ham nahīñ hoñge

hamāre hī lahū se tāzgī ġhunchoñ ne paa.ī hai

na hogā ye chaman rashk-e-iram jab ham nahīñ hoñge

abhī is raaz ko samjhe nahii. ahl-e-gulistāñ bhī

bahut dar-pesh ā.eñge alam jab ham nahīñ hoñge

hamāre dam se maiñ ahl-e-junūñ dasht-o-bayābāñ meñ

ukhaḌ jā.eñge un ke bhī qadam jab ham nahīñ hoñge

hazāroñ rāh-rau gum hoke rah jā.eñge rāhoñ meñ

baḌheñge manziloñ ke pech-o-ḳham jab ham nahīñ hoñge

hamāre ba.ad aisā inqalāb aa.egā duniyā meñ

sukūñ hāsil na hogā mohtaram jab ham nahīñ hoñge

yañh to tishnagī meñ bhī na saaqī se shikāyat kī

rahegā mai-kade kā kyā bhram jab ham nahīñ hoñge

mai-e-ishrat ke badle zahar pī kar shādmāñ ham haiñ

pīye.gā kaun yuuñ sāġhar se sam jab ham nahīñ hoñge

hamāre ba.ad zauq-e-mai-kashī kis ko atā hogā

bahak jā.eñge rindoñ ke qadam jab ham nahīñ hoñge

hamāre hī tasarruf se nujūm-e-charḳh raushan haiñ

na koī dil banegā jām-e-jam jab ham nahīñ hoñge

numāyāñ hogī arbāb-e-haram kī maslahat-bīnī

bujhā deñge yahī sham-e-haram jab ham nahīñ hoñge

hamīñ se hai ye husn-e-ahd-o-paimāñ rasm-e-dil-dārī

na hoñge mo'atabar qaul-o-qasam jab ham nahīñ hoñge

azal se āshnā ab tak mizāj-e-husn se ham haiñ

na suljheñge kabhī zulfoñ ke ḳham jab ham nahīñ hoñge

hamārā hī to kaasa hai bhram terī saḳhāvat kā

na hoñge tālib-e-luf-o-karam jab ham nahīñ hoñge

abhī to dekh kar ham ko tum āñkheñ pher lete ho

raheñge dard bab-kar dil meñ ham jab ham nahīñ hoñge

miTāte ho miTā Daalo ḳhirām-e-nāz se lekin

na roke se rukeñge ashk-e-ġham jab ham nahīñ hoñge

hamīñ to manzil-e-sabr-o-razā ke aaj rahbar haiñ

rahegā kaun phir sābit-qadam jab ham nahīñ hoñge

hamīñ ne to sañvāre haiñ hamesha kākul-e-hastī

paḌeñge kākul-e-hastī meñ ḳham jab ham nahīñ hoñge

hamīñ se mutrib-e-naġhma-sarā kī qadr-o-qīmat hai

na hoñge saaz meñ ye zer-o-bam jab ham nahīñ hoñge

hamīñ tak jānkārī bhī hai manzil āshnā.ī kī

nahīñ pahuñcheñge manzil tak qadam jab ham nahīñ hoñge

hamāre ba.ad sāhil tak kashtī na pahuñchegī

na.e ubhreñge tūfāñ dam-ba-dam jab ham nahīñ hoñge

ummīdoñ ke safīne Duub jā.eñge kināre par

uTheñge is tarah tūfān-e-ġham jab ham nahīñ hoñge

chārāġh-e-rah-e-manzil ban ke chamkegā añdheroñ meñ

hamārā ek-ek naqsh-e-qadam jab ham nahīñ hoñge

hamīñ ne be-bahā motī bhare haiñ us ke dāman meñ

hamīñ royā karegī shām-e-ġham jab ham nahīñ hoñge

haqīqat meñ bayāñ jo kuchh ka.e rāz-e-nihāñ ham ne

samajh meñ ā.eñge ai mohtaram jab ham nahīñ hoñge

nihāñ ho jā.egā ḳhurshed but-ḳhāna bhī ai 'sādiq'

ayaañ hogā na mahtāb-e-haram jab ham nahīñ hoñge

hijābāt-e-nazar ham ne uThā rakhe haiñ ai 'sādiq'

na dekhegā koī rū-e-sanam jab ham nahīñ hoñge

mohabbat ka rahega kya bhram jab hum nahin honge

tamasha ban ke rah jayga gham jab hum nahin honge

kise hoga yahan arman-e-gham jab hum nahin honge

na hoga koi marhun-e-sitam jab hum nahin honge

bahut pachhtaenge ahl-e-karam jab hum nahin honge

kise baKHshenge duniya bhar ke gham jab hum nahin honge

abhi to waqt hai hum se wafaon ka sabaq le lo

wafa ho jaegi duniya mein kam jab hum nahin honge

hamin se to mazaq-e-ishq ka mear qaim hai

na hoga koi afsana raqam jab hum nahin honge

hamin se dastan-e-sarmad-o-mansur zinda hai

raza har sar karega kaun KHam jab hum nahin honge

hamare baad hans kar zaKHm dil par kaun khaega

chalegi kis pe phir tegh-e-sitam jab hum nahin honge

hamare baad ye hangam-e-mahshar kaun dekhega

banega kaun taswir-e-alam jab hum nahin honge

hamin ne aap ki rahon ko sajdon se sajaya hai

na honge phir ye aadab-e-haram jab hum nahin honge

hamare baad koi banda-e-bedam kya hoga

dhare rah jaenge qaul-o-qasam jab hum nahin honge

hamari zindagi dars-e-amal hai ahl-e-duniya ko

na hoga phir kisi ka kuchh bhram jab hum nahin honge

kuchh aise naqsh apne baad hum chhoDenge duniya mein

likhenge dastan ahl-e-qalam jab hum nahin honge

zaban-e-KHalq par hoga hamare gham ka afsana

jahan ko yaad phir aaenge hum jab hum nahin honge

hamari KHamushi mein saikDon asrar pinhan hain

hamahin roenge arbab-e-sitam jab hum nahin honge

hamari zindagi hamil hai asrar-e-mohabbat ki

milenge kab amin-e-dard-o-gham jab hum nahin honge

hamin se pairwi mansub hai ahl-e-mohabbat ki

na chumega koi naqsh-e-qadam jab hum nahin honge

hamin se hai ye qadr-o-manzilat shaiKH-o-barhaman ki

na hogi hurmat-e-dair-o-haram jab hum nahin honge

hamare KHalaq se qaem waqar-e-adamiyat hai

na hogi aadamiyat mughtanim jab hum nahin honge

hamare baad mi'mar-e-mohabbat kaun aayega

na hoga phir zamana yun ba-ham jab hum nahin honge

hamare hi lahu se tazgi ghunchon ne pai hai

na hoga ye chaman rashk-e-iram jab hum nahin honge

abhi is raaz ko samjhe nahi ahl-e-gulistan bhi

bahut dar-pesh aaenge alam jab hum nahin honge

hamare dam se main ahl-e-junun dasht-o-bayaban mein

ukhaD jaenge un ke bhi qadam jab hum nahin honge

hazaron rah-rau gum hoke rah jaenge rahon mein

baDhenge manzilon ke pech-o-KHam jab hum nahin honge

hamare baad aisa inqalab aaega duniya mein

sukun hasil na hoga mohtaram jab hum nahin honge

yanh to tishnagi mein bhi na saqi se shikayat ki

rahega mai-kade ka kya bhram jab hum nahin honge

mai-e-ishrat ke badle zahar pi kar shadman hum hain

piyega kaun yun saghar se sam jab hum nahin honge

hamare baad zauq-e-mai-kashi kis ko ata hoga

bahak jaenge rindon ke qadam jab hum nahin honge

hamare hi tasarruf se nujum-e-charKH raushan hain

na koi dil banega jam-e-jam jab hum nahin honge

numayan hogi arbab-e-haram ki maslahat-bini

bujha denge yahi sham-e-haram jab hum nahin honge

hamin se hai ye husn-e-ahd-o-paiman rasm-e-dil-dari

na honge mo'atabar qaul-o-qasam jab hum nahin honge

azal se aashna ab tak mizaj-e-husn se hum hain

na suljhenge kabhi zulfon ke KHam jab hum nahin honge

hamara hi to kasa hai bhram teri saKHawat ka

na honge talib-e-luf-o-karam jab hum nahin honge

abhi to dekh kar hum ko tum aankhen pher lete ho

rahenge dard bab-kar dil mein hum jab hum nahin honge

miTate ho miTa Dalo KHiram-e-naz se lekin

na roke se rukenge ashk-e-gham jab hum nahin honge

hamin to manzil-e-sabr-o-raza ke aaj rahbar hain

rahega kaun phir sabit-qadam jab hum nahin honge

hamin ne to sanware hain hamesha kakul-e-hasti

paDenge kakul-e-hasti mein KHam jab hum nahin honge

hamin se mutrib-e-naghma-sara ki qadr-o-qimat hai

na honge saz mein ye zer-o-bam jab hum nahin honge

hamin tak jaankari bhi hai manzil aashnai ki

nahin pahunchenge manzil tak qadam jab hum nahin honge

hamare baad sahil tak kashti na pahunchegi

nae ubhrenge tufan dam-ba-dam jab hum nahin honge

ummidon ke safine Dub jaenge kinare par

uThenge is tarah tufan-e-gham jab hum nahin honge

chaaragh-e-rah-e-manzil ban ke chamkega andheron mein

hamara ek-ek naqsh-e-qadam jab hum nahin honge

hamin ne be-baha moti bhare hain us ke daman mein

hamin roya karegi sham-e-gham jab hum nahin honge

haqiqat mein bayan jo kuchh kae raaz-e-nihan hum ne

samajh mein aaenge ai mohtaram jab hum nahin honge

nihan ho jaega KHurshed but-KHana bhi ai 'sadiq'

ayan hoga na mahtab-e-haram jab hum nahin honge

hijabaat-e-nazar hum ne uTha rakhe hain ai 'sadiq'

na dekhega koi ru-e-sanam jab hum nahin honge