KHamosh tere kuche mein jaya nahin jata

ḳhāmosh tire kūche meñ jaayā nahīñ jaatā

o bhūlne vaale tū bhulā yā nahīñ jaatā

badle ġham-e-furqat ke mujhe maar hī Daalo

do zahar ki ye zahar to khāyā nahīñ jaatā

mujh se unheñ sab kuchh ho mohabbat to nahīñ hai

ehsān mohabbat meñ jatāyā nahīñ jaatā

ham haiñ ki kabhī aañkh milā.ī nahīñ jaatī

vo haiñ ki kabhī haath milā yā nahīñ jaatā

kis tarah dikhā.ūñ maiñ jise dekh rahā huuñ

jo dekh rahā huuñ vo dikhāyā nahīñ jaatā

rūThe hue ma.ashūq to haiñ maan bhī jaate

machlā huā dil hai ye manāyā nahīñ jaatā

har ek se bad-zan na ho ai qātil-e-a.alam

har ek ko ma.ashūq banāyā nahīñ jaatā

kaTtī hai apāhij kī tarah aap kī dhun meñ

uTThā nahīñ jaatā kahīñ jaayā nahīñ jaatā

jis tarah satāyā hai 'safī' dost ne mujh ko

dushman ko bhī is tarah satāyā nahīñ jaatā

KHamosh tere kuche mein jaya nahin jata

o bhulne wale tu bhula ya nahin jata

badle gham-e-furqat ke mujhe mar hi Dalo

do zahar ki ye zahar to khaya nahin jata

mujh se unhen sab kuchh ho mohabbat to nahin hai

ehsan mohabbat mein jataya nahin jata

hum hain ki kabhi aankh milai nahin jati

wo hain ki kabhi hath mila ya nahin jata

kis tarah dikhaun main jise dekh raha hun

jo dekh raha hun wo dikhaya nahin jata

ruThe hue mashuq to hain man bhi jate

machla hua dil hai ye manaya nahin jata

har ek se bad-zan na ho ai qatil-e-alam

har ek ko mashuq banaya nahin jata

kaTti hai apahij ki tarah aap ki dhun mein

uTTha nahin jata kahin jaya nahin jata

jis tarah sataya hai 'safi' dost ne mujh ko

dushman ko bhi is tarah sataya nahin jata