dil ke kho jaane se main kis waste roya karun

dil ke kho jaane se maiñ kis vāste royā karūñ

kho gayā to aap ne khoyā use maiñ kyā karūñ

sāmne aa.e to us ko dekh saktā bhī nahīñ

aarzū hī aarzū hai bas use dekhā karūñ

dardmandoñ ko tashaffī do tasallī do zarā

ye kahāñ kī baat sīkhī aap ne maiñ kyā karūñ

baat muñh meñ hai ki matlab tak pahuñch jaatā hai vo

kahiye phir aise se iz.hār-e-tamannā kyā karūñ

raat kī taklīf mehmānī hai sirf is vāste

sub.h ko uTThūñ to sūrat aap kī dekhā karūñ

kaun sā āfat-zada rahtā hai kūcha meñ tire

shab ko ik āvāz aatī hai ilāhī kyā karūñ

ai 'safī' ab maiñ ne dil meñ Thaan lī hai ek baat

sab kī sunñe ko to sun luuñ kaam karne kā karūñ

dil ke kho jaane se main kis waste roya karun

kho gaya to aap ne khoya use main kya karun

samne aae to us ko dekh sakta bhi nahin

aarzu hi aarzu hai bas use dekha karun

dardmandon ko tashaffi do tasalli do zara

ye kahan ki baat sikhi aap ne main kya karun

baat munh mein hai ki matlab tak pahunch jata hai wo

kahiye phir aise se izhaar-e-tamanna kya karun

raat ki taklif mehmani hai sirf is waste

subh ko uTThun to surat aap ki dekha karun

kaun sa aafat-zada rahta hai kucha mein tere

shab ko ek aawaz aati hai ilahi kya karun

ai 'safi' ab main ne dil mein Than li hai ek baat

sab ki sunne ko to sun lun kaam karne ka karun