mohabbat se na dekho tum to dushman ki nazar dekho

mohabbat se na dekho tum to dushman kī nazar dekho

ḳhafā hokar bigaḌ kar ruuTh kar dekho magar dekho

ḳhudā ne dī haiñ āñkheñ dekhne hī ko magar dekho

zarā khoTā kharā parkho zarā aib-o-hunar dekho

zamāne ne to sau-sau tarah ham ko āzmāyā hai

jahāñ tak zulm ho saktā hai tum se tum bhī kar dekho

tamāshā-gāh-e-ālam meñ tamāshā ek ham bhī haiñ

tum apne dil ke mālik ho jidhar chāho udhar dekho

tumhāre dil meñ kis zālim ne Daalī bad-zanī aisī

mujhe dekho duā dekho duāoñ kā asar dekho

tabāhī aur phir kaisī tabāhī aaj tak ham ne

zarā insāf se tum apne dil meñ soch kar dekho

lihāz un ḳhūbsūrat zālimoñ kā kyā kare koī

mirā dard-e-jigar dāġh-e-jigar zaḳhm-e-jigar dekho

koī be-tāb koī mast koī chup koī hairāñ

tirī mahfil meñ goyā ik tamāshā hai jidhar dekho

kahāñ tak minnateñ ab to yahī jī meñ samā.ī hai

mile koī milo koī dikhā.ī de agar dekho

duā.eñ lete jaate haiñ tasallī dete jaate haiñ

zabānī jam'-ḳharch un kā baḌhā hai kis qadar dekho

dil-e-gum-gashta kī bābat mere hañs kar vo ye bole

yahāñ dekho vahāñ dekho idhar dekho udhar dekho

tumhārī dushmanī ne dushmanī ke gur sikhā.e haiñ

nahīñ to ham na the hoshiyār pahle is qadar dekho

tumheñ ma.alūm hai jo haal hai lekin zarā phir bhī

idhar aao mere nazdīk baiTho ik nazar dekho

havas-kārī hai parde meñ mohabbat ke 'safī' sāhib

banāyā aib ko bhī yaar logoñ ne hunar dekho

mohabbat se na dekho tum to dushman ki nazar dekho

KHafa hokar bigaD kar ruTh kar dekho magar dekho

KHuda ne di hain aankhen dekhne hi ko magar dekho

zara khoTa khara parkho zara aib-o-hunar dekho

zamane ne to sau-sau tarah hum ko aazmaya hai

jahan tak zulm ho sakta hai tum se tum bhi kar dekho

tamasha-gah-e-alam mein tamasha ek hum bhi hain

tum apne dil ke malik ho jidhar chaho udhar dekho

tumhaare dil mein kis zalim ne Dali bad-zani aisi

mujhe dekho dua dekho duaon ka asar dekho

tabahi aur phir kaisi tabahi aaj tak hum ne

zara insaf se tum apne dil mein soch kar dekho

lihaz un KHubsurat zalimon ka kya kare koi

mera dard-e-jigar dagh-e-jigar zaKHm-e-jigar dekho

koi be-tab koi mast koi chup koi hairan

teri mahfil mein goya ek tamasha hai jidhar dekho

kahan tak minnaten ab to yahi ji mein samai hai

mile koi milo koi dikhai de agar dekho

duaen lete jate hain tasalli dete jate hain

zabani jam'-KHarch un ka baDha hai kis qadar dekho

dil-e-gum-gashta ki babat mere hans kar wo ye bole

yahan dekho wahan dekho idhar dekho udhar dekho

tumhaari dushmani ne dushmani ke gur sikhae hain

nahin to hum na the hoshiyar pahle is qadar dekho

tumhein malum hai jo haal hai lekin zara phir bhi

idhar aao mere nazdik baiTho ek nazar dekho

hawas-kari hai parde mein mohabbat ke 'safi' sahib

banaya aib ko bhi yar logon ne hunar dekho