gile shikwe karenge zulm ke ab us sitam-gar se

gile shikve kareñge zulm ke ab us sitam-gar se

kaho phir kyā kare koī jo ūñchī ho ga.ī sar se

hameñ dard-o-alam kam hī mile hoñge muqaddar se

magar phir bhī bahut ro.e bahut taḌpe bahut tarse

tabī.at bujh ga.ī jab se tire dīdār ko tarse

agar ab niiñd bhī aatī hai uTh jaate haiñ bistar se

burā ho yā ilāhī iztirāb-e-qalb-e-muztar kā

na rah saktā huuñ bistar par na uTh saktā huuñ bistar se

liyā jab chāhne kā naam farmāyā baḌe chāhā

tarasne kā kyā jab zikr farmāyā baḌe tarse

bahār aa.e to yārab har kalī gulzār ho jaa.e

baḌī hasrat meñ guzrī ab ke ik ik phuul ko tarse

kisī kā ḳhat kahāñ ham ne to be-par kī uḌaa.ī thī

magar logoñ ko dekho chhaT ga.e dil meñ kabūtar se

na jaane rah ga.ī bhūle se dil meñ kaun sī hasrat

koī rah rah ke goyā chīrtā hai dil ko nashtar se

hameñ ma.ashūq ko apnā banānā tak nahīñ aatā

banāne vaale ā.īna banā lete haiñ patthar se

zabāñ se aah niklī dil se naala aañkh se aañsū

magar ik terī dhun hai jo nikaltī hī nahīñ sar se

are nādān sachchā chāhne vaalā nahīñ miltā

vo lailā thī ki jis ko mil gayā majnūñ muqaddar se

milan-sārī bhī sīkho jab nigāh-e-nāz paa.ī hai

mirī jaañ aadmī aḳhlāq se talvār jauhar se

ḳhudā kī shaan matlab-āshnā aise bhī hote haiñ

butoñ ne ban ke but sajda karāyā pahle but-gar se

'safī' ko muskurā kar dekh lo ġhussa se kyā hāsil

use tum zahr kyuuñ dete ho jo martā hai shakkar se

gile shikwe karenge zulm ke ab us sitam-gar se

kaho phir kya kare koi jo unchi ho gai sar se

hamein dard-o-alam kam hi mile honge muqaddar se

magar phir bhi bahut roe bahut taDpe bahut tarse

tabiat bujh gai jab se tere didar ko tarse

agar ab nind bhi aati hai uTh jate hain bistar se

bura ho ya ilahi iztirab-e-qalb-e-muztar ka

na rah sakta hun bistar par na uTh sakta hun bistar se

liya jab chahne ka nam farmaya baDe chaha

tarasne ka kya jab zikr farmaya baDe tarse

bahaar aae to yarab har kali gulzar ho jae

baDi hasrat mein guzri ab ke ek ek phul ko tarse

kisi ka KHat kahan hum ne to be-par ki uDai thi

magar logon ko dekho chhaT gae dil mein kabutar se

na jaane rah gai bhule se dil mein kaun si hasrat

koi rah rah ke goya chirta hai dil ko nashtar se

hamein mashuq ko apna banana tak nahin aata

banane wale aaina bana lete hain patthar se

zaban se aah nikli dil se nala aankh se aansu

magar ek teri dhun hai jo nikalti hi nahin sar se

are nadan sachcha chahne wala nahin milta

wo laila thi ki jis ko mil gaya majnun muqaddar se

milan-sari bhi sikho jab nigah-e-naz pai hai

meri jaan aadmi aKHlaq se talwar jauhar se

KHuda ki shan matlab-ashna aise bhi hote hain

buton ne ban ke but sajda karaya pahle but-gar se

'safi' ko muskura kar dekh lo ghussa se kya hasil

use tum zahr kyun dete ho jo marta hai shakkar se