aarzu bhi dil mein tark-e-arzu bhi dil mein hai

aarzū bhī dil meñ tark-e-ārzū bhī dil meñ hai

aadmī kī jaan mushkil kyā baḌī mushkil meñ hai

chain tanhā.ī meñ hāsil hai na ab mahfil meñ hai

bas usī meñ dil hai jab se vo hamāre dil meñ hai

hai tamāshā.ī bhī koī to baḌī mushkil meñ hai

aap ke bas meñ hai jab tak aap kī mahfil meñ hai

kyuuñ parāyā maal samjhe vo parā.e maal ko

dost kā dil to hisāb-e-dostāñ dar-e-dil meñ hai

dījiye kushtoñ ko apnī jāñ-nisārī kā silā

tan to har mushkil se chhūTā jaan ab mushkil meñ hai

mehmānī meñ ye jiddat vaah ai hāzir-javāb

sab kī izzat bazm meñ hai merī izzat dil meñ hai

kyā kahūñ maiñ un muazzaz nukta-chīnoñ ko 'safī'

guftugū mahfil se bāhar ḳhāmushī mahfil meñ hai

aarzu bhi dil mein tark-e-arzu bhi dil mein hai

aadmi ki jaan mushkil kya baDi mushkil mein hai

chain tanhai mein hasil hai na ab mahfil mein hai

bas usi mein dil hai jab se wo hamare dil mein hai

hai tamashai bhi koi to baDi mushkil mein hai

aap ke bas mein hai jab tak aap ki mahfil mein hai

kyun paraya mal samjhe wo parae mal ko

dost ka dil to hisab-e-dostan dar-e-dil mein hai

dijiye kushton ko apni jaan-nisari ka sila

tan to har mushkil se chhuTa jaan ab mushkil mein hai

mehmani mein ye jiddat wah ai hazir-jawab

sab ki izzat bazm mein hai meri izzat dil mein hai

kya kahun main un muazzaz nukta-chinon ko 'safi'

guftugu mahfil se bahar KHamushi mahfil mein hai