آرزو بھی دل میں ترک آرزو بھی دل میں ہے

آرزو بھی دل میں ترک آرزو بھی دل میں ہے

آدمی کی جان مشکل کیا بڑی مشکل میں ہے

چین تنہائی میں حاصل ہے نہ اب محفل میں ہے

بس اسی میں دل ہے جب سے وہ ہمارے دل میں ہے

ہے تماشائی بھی کوئی تو بڑی مشکل میں ہے

آپ کے بس میں ہے جب تک آپ کی محفل میں ہے

کیوں پرایا مال سمجھے وہ پرائے مال کو

دوست کا دل تو حساب دوستاں در دل میں ہے

دیجیے کشتوں کو اپنی جاں نثاری کا صلا

تن تو ہر مشکل سے چھوٹا جان اب مشکل میں ہے

میہمانی میں یہ جدت واہ اے حاضر جواب

سب کی عزت بزم میں ہے میری عزت دل میں ہے

کیا کہوں میں ان معزز نکتہ چینوں کو صفیؔ

گفتگو محفل سے باہر خامشی محفل میں ہے