wufur-e-dard mein takid hansne muskurane ki

vufūr-e-dard meñ tākīd hañsne muskurāne kī

kahāñ tak ro.e koī haa.e be-dardī zamāne kī

junūñ hai ishq lekin ishq kis kā hosh-mandoñ kā

jo sab kuchh jānte haiñ kyā badī hai aur kyā nekī

na pūchho husn hai yā husn vaalā qābil-e-sajda

zarā laġhzish huī to baat hai īmān jaane kī

bahut dekhā hai kaliyoñ kā tabassum aur dekheñge

kahāñ se aa.egī ye shaan tere muskurāne kī

kyā bad-zan use ab aur mere dost kyā karte

chalī vo chaal rāheñ band kar diiñ aane jaane kī

'safī' dair-o-haram kuchh kam na the shauq-e-parastish ko

magar azmat dikhānī thī kisī ke āstāne kī

'safī' apnī zabāñ roko zamāne kī shikāyat se

bigaḌtī jā rahī hai raat din hālat zamāne kī

wufur-e-dard mein takid hansne muskurane ki

kahan tak roe koi hae be-dardi zamane ki

junun hai ishq lekin ishq kis ka hosh-mandon ka

jo sab kuchh jaante hain kya badi hai aur kya neki

na puchho husn hai ya husn wala qabil-e-sajda

zara laghzish hui to baat hai iman jaane ki

bahut dekha hai kaliyon ka tabassum aur dekhenge

kahan se aaegi ye shan tere muskurane ki

kya bad-zan use ab aur mere dost kya karte

chali wo chaal rahen band kar din aane jaane ki

'safi' dair-o-haram kuchh kam na the shauq-e-parastish ko

magar azmat dikhani thi kisi ke aastane ki

'safi' apni zaban roko zamane ki shikayat se

bigaDti ja rahi hai raat din haalat zamane ki