وفور درد میں تاکید ہنسنے مسکرانے کی

وفور درد میں تاکید ہنسنے مسکرانے کی

کہاں تک روئے کوئی ہائے بے‌ دردی زمانے کی

جنوں ہے عشق لیکن عشق کس کا ہوش مندوں کا

جو سب کچھ جانتے ہیں کیا بدی ہے اور کیا نیکی

نہ پوچھو حسن ہے یا حسن والا قابل سجدہ

ذرا لغزش ہوئی تو بات ہے ایمان جانے کی

بہت دیکھا ہے کلیوں کا تبسم اور دیکھیں گے

کہاں سے آئے گی یہ شان تیرے مسکرانے کی

کیا بد ظن اسے اب اور میرے دوست کیا کرتے

چلی وہ چال راہیں بند کر دیں آنے جانے کی

صفیؔ دیر و حرم کچھ کم نہ تھے شوق پرستش کو

مگر عظمت دکھانی تھی کسی کے آستانے کی

صفیؔ اپنی زباں روکو زمانے کی شکایت سے

بگڑتی جا رہی ہے رات دن حالت زمانے کی