chal diya wo rashk-e-mah ghar apna suna ho gaya

chal diyā vo rashk-e-mah ghar apnā suunā ho gayā

chaar din kī chāñdnī thī phir añdherā ho gayā

āshiqī meñ vahm baḌhte baḌhte saudā ho gayā

qatra qatra jam.a hote hote dariyā ho gayā

kyā yahī hai sharm tere bhole-pan ke maiñ nisār

muñh pe donoñ haath rakh lene se pardā ho gayā

kuchh ho lekin mirā dil tum se phirne kā nahīñ

ye to jis kā ho gayā kam-baḳht us kā ho gayā

āshiqī meñ nek-o-bad par aañkh paḌtī hī nahīñ

is balā ne aa liyā jis ko vo andhā ho gayā

dāġh-e-hā-e-hijr bhī haiñ dil meñ ḳhār-e-shauq bhī

baaġh kā baaġh aur ye sahrā kā sahrā ho gayā

merī har ik baat qānūn-e-mohabbat hai magar

ai 'safī' maiñ shā.erī karne se jhūTā ho gayā

chal diya wo rashk-e-mah ghar apna suna ho gaya

chaar din ki chandni thi phir andhera ho gaya

aashiqi mein wahm baDhte baDhte sauda ho gaya

qatra qatra jama hote hote dariya ho gaya

kya yahi hai sharm tere bhole-pan ke main nisar

munh pe donon hath rakh lene se parda ho gaya

kuchh ho lekin mera dil tum se phirne ka nahin

ye to jis ka ho gaya kam-baKHt us ka ho gaya

aashiqi mein nek-o-bad par aankh paDti hi nahin

is bala ne aa liya jis ko wo andha ho gaya

dagh-e-ha-e-hijr bhi hain dil mein KHar-e-shauq bhi

bagh ka bagh aur ye sahra ka sahra ho gaya

meri har ek baat qanun-e-mohabbat hai magar

ai 'safi' main shaeri karne se jhuTa ho gaya