use sab log zalim be-wafa qatil samajhte hain

use sab log zālim be-vafā qātil samajhte haiñ

magar ham haiñ ki apnī jaan apnā dil samajhte haiñ

hazār afsos ham apne ko kis qābil samajhte haiñ

ki vo to be-kahe bhī ārzū-e-dil samajhte haiñ

jo koī tum pe martā aur tum par jaan detā hai

ta.ajjub hai usī ko log zinda-dil samajhte haiñ

na samjheñ to na samjheñ husn vaale dard-e-dil merā

mere allāh ne jin ko diyā hai dil samajhte haiñ

ilāhī kaun sī shai tuune rakhī hai hasīnoñ meñ

ki un ko log apnī jaan apnā dil samajhte haiñ

kabhī fursat se socheñge ki us kā hashr kyā hogā

abhī ham ek kāfir dil ko apnā dil samajhte haiñ

kisī ko koī kyā degā kisī se koī kyā legā

'safī' ham to hisāb-e-dostāñ dar dil samajhte haiñ

use sab log zalim be-wafa qatil samajhte hain

magar hum hain ki apni jaan apna dil samajhte hain

hazar afsos hum apne ko kis qabil samajhte hain

ki wo to be-kahe bhi aarzu-e-dil samajhte hain

jo koi tum pe marta aur tum par jaan deta hai

tajjub hai usi ko log zinda-dil samajhte hain

na samjhen to na samjhen husn wale dard-e-dil mera

mere allah ne jin ko diya hai dil samajhte hain

ilahi kaun si shai tune rakhi hai hasinon mein

ki un ko log apni jaan apna dil samajhte hain

kabhi fursat se sochenge ki us ka hashr kya hoga

abhi hum ek kafir dil ko apna dil samajhte hain

kisi ko koi kya dega kisi se koi kya lega

'safi' hum to hisab-e-dostan dar dil samajhte hain