اسے سب لوگ ظالم بے وفا قاتل سمجھتے ہیں

اسے سب لوگ ظالم بے وفا قاتل سمجھتے ہیں

مگر ہم ہیں کہ اپنی جان اپنا دل سمجھتے ہیں

ہزار افسوس ہم اپنے کو کس قابل سمجھتے ہیں

کہ وہ تو بے کہے بھی آرزوئے دل سمجھتے ہیں

جو کوئی تم پہ مرتا اور تم پر جان دیتا ہے

تعجب ہے اسی کو لوگ زندہ دل سمجھتے ہیں

نہ سمجھیں تو نہ سمجھیں حسن والے درد دل میرا

میرے اللہ نے جن کو دیا ہے دل سمجھتے ہیں

الٰہی کون سی شئے تونے رکھی ہے حسینوں میں

کہ ان کو لوگ اپنی جان اپنا دل سمجھتے ہیں

کبھی فرصت سے سوچیں گے کہ اس کا حشر کیا ہو گا

ابھی ہم ایک کافر دل کو اپنا دل سمجھتے ہیں

کسی کو کوئی کیا دے گا کسی سے کوئی کیا لے گا

صفیؔ ہم تو حساب دوستاں در دل سمجھتے ہیں