jo yatimon pe mohabbat ki nazar rakhte hain

jo yatīmoñ pe mohabbat kī nazar rakhte haiñ

apne dāman meñ vo anmol guhar rakhte haiñ

ye alag baat hai shikvā nahīñ karte lekin

har sitam aap kā ham zer-e-nazar rakhte haiñ

ḳhaar rāhoñ meñ bichhā kar na Darāo ham ko

ham to sho.aloñ pe bhī chalne kā hunar rakhte haiñ

vo nahīñ Darte zamāne ke sitam-gāroñ se

apne siine meñ jo sheroñ kā jigar rakhte haiñ

dhuup ḳhud oḌh ke dete haiñ jo ham ko saaya

kis qadar fikr hamārī ye shajar rakhte haiñ

naaz hai tum ko to hai fakHr hameñ bhī ḳhud par

husn tum rakhte ho ham husn-e-nazar rakhte haiñ

le ke sāhil pe safīne ko pahuñchte haiñ vahī

apne dil meñ jo faroġh-e-’azm-e-safar rakhte haiñ

jo yatimon pe mohabbat ki nazar rakhte hain

apne daman mein wo anmol guhar rakhte hain

ye alag baat hai shikwa nahin karte lekin

har sitam aap ka hum zer-e-nazar rakhte hain

KHar rahon mein bichha kar na Darao hum ko

hum to shoalon pe bhi chalne ka hunar rakhte hain

wo nahin Darte zamane ke sitam-garon se

apne sine mein jo sheron ka jigar rakhte hain

dhup KHud oDh ke dete hain jo hum ko saya

kis qadar fikr hamari ye shajar rakhte hain

naz hai tum ko to hai fakHr hamein bhi KHud par

husn tum rakhte ho hum husn-e-nazar rakhte hain

le ke sahil pe safine ko pahunchte hain wahi

apne dil mein jo farogh-e-’azm-e-safar rakhte hain