جو یتیموں پہ محبت کی نظر رکھتے ہیں

جو یتیموں پہ محبت کی نظر رکھتے ہیں

اپنے دامن میں وہ انمول گہر رکھتے ہیں

یہ الگ بات ہے شکوہ نہیں کرتے لیکن

ہر ستم آپ کا ہم زیر نظر رکھتے ہیں

خار راہوں میں بچھا کر نہ ڈراؤ ہم کو

ہم تو شعلوں پہ بھی چلنے کا ہنر رکھتے ہیں

وہ نہیں ڈرتے زمانے کے ستم گاروں سے

اپنے سینے میں جو شیروں کا جگر رکھتے ہیں

دھوپ خود اوڑھ کے دیتے ہیں جو ہم کو سایہ

کس قدر فکر ہماری یہ شجر رکھتے ہیں

ناز ہے تم کو تو ہے فخر ہمیں بھی خود پر

حسن تم رکھتے ہو ہم حسن نظر رکھتے ہیں

لے کے ساحل پہ سفینے کو پہنچتے ہیں وہی

اپنے دل میں جو فروغ عزم سفر رکھتے ہیں