sahar-e-chaman mein gulon ki hansi bhi kaam aai

sahar-e-chaman meñ guloñ kī hañsī bhī kaam aa.ī

magar nasīm kī āshuftagī bhī kaam aa.ī

mahak rahā hai tirā husn-e-be-rukHī us meñ

hamāre dil kī fasurda kalī bhī kaam aa.ī

vo husn dekh liyā tujh meñ jo na thā tujh meñ

mirī nigāh kī nā-āgahī bhī kaam aa.ī

junūñ sahī ye mirā tark-e-ārzū lekin

mire junūñ meñ tirī be-ruḳhī bhī kaam aa.ī

rah-e-ġhalat pe qadam rakh ke lauT aayā huuñ

kabhī kabhī mirī kam-himmatī bhī kaam aa.ī

vahāñ mile vo jahāñ kā mujhe gumāñ bhī na thā

mirā junūn-e-āvārgī bhī kaam aa.ī

mirī talab se ziyāda milā mujhe 'maikash'

dam-e-savāl mirī ḳhāmoshī bhī kaam aa.ī

sahar-e-chaman mein gulon ki hansi bhi kaam aai

magar nasim ki aashuftagi bhi kaam aai

mahak raha hai tera husn-e-be-rukHi us mein

hamare dil ki fasurda kali bhi kaam aai

wo husn dekh liya tujh mein jo na tha tujh mein

meri nigah ki na-agahi bhi kaam aai

junun sahi ye mera tark-e-arzu lekin

mere junun mein teri be-ruKHi bhi kaam aai

rah-e-ghalat pe qadam rakh ke lauT aaya hun

kabhi kabhi meri kam-himmati bhi kaam aai

wahan mile wo jahan ka mujhe guman bhi na tha

mera junun-e-awargi bhi kaam aai

meri talab se ziyaada mila mujhe 'maikash'

dam-e-sawal meri KHamoshi bhi kaam aai