کیوں ہجرِ یار میں نہ قیامت بپا کرے

کیوں ہجرِ یار میں نہ قیامت بپا کرے

عاشق کے ہاتھ میں جو نہ ہو دل تو کیا کرے

جائے نہ واں مرا دل نالاں خدا کرے

ایسا نہ ہو کہ حشر میں محشر بپا کرے

میں نے کہا کہ جان سے جاتا ہوں جانِ من

بولا وہ بت کہ ہو بھی تو ایسا خدا کرے

ہل جائیں لب گلہ میں ہمارے مجال کیا

جو ظلم و جور چاہے وہ ظالم کیا کرے

زاہد میرے صنم کو حقارت سے تو نہ دیکھ

قدرت ذرا بھی ہو تو خدا جانے کیا کرے

مرقد پہ میرے آ کے یہ بولا وہ رشکِ حور

اللہ اس غریب کو جنت عطا کرے

جاتا ہے سوئے گورِ غریباں وہ شوخ آج

ڈر ہے کہ ٹھوکروں میں نہ محشر بپا کرے

آئینہ پر غبار مناسب نہیں حضور

اچھا نہیں ہے کینہ جو دل میں رہا کرے

ذرہ کو جو بناتا ہے ہم چشم آفتاب

چاہے اگر وہ بت کو خدا جانے کیا کرے

اغیار سے یہ لطف و مدارا یہ رسم و راہ

کچھ تو نگاہ لطف ادھر بھی رہا کرے

عاشق کا تیرے ہجر میں اب حال غیر ہے

بیچارہ کیا عجب ہے کہ دم میں قضا کرے

ہم رند مشربوں سے عبث ہے یہ چھیڑ چھاڑ

واعظ سے کہہ دو عقل کی اپنے دوا کرے

تڑپا رہا ہے ہجر مدینہ غلام کو

قابو میں دل نہیں ہے کہاں جائے کیا کرے

ہے التجا خدا سے صمدؔ کی بچشم تر

دشمن ہو یا کہ دوست ہو سب کا بھلا کرے