منہ پہ ڈالے کوئی زلفوں کی نقاب آتا ہے

منہ پہ ڈالے کوئی زلفوں کی نقاب آتا ہے

یا چھپائے مہِ کامل کو سحاب آتا ہے

خونِ دل پیتا ہوں جب بادۂ ناب آتا ہے

لختِ دل کھاتا ہوں جب ذکرِ کباب آتا ہے

تشنہ کامانِ شہادت کو ستم گو تیرے

گِرد مقتل کے نظر سرُخ سراب آتا ہے

دولتِ حُسن کا صدقہ کوئی بوسہ دے دے

صاحبِ مال پہ فتوائے نصاب آتا ہے

جلوہ دکھلا کے کیا آنکھوں کو میری خیرہ

بے حجابی پہ انہیں طرفہ حجاب آتا ہے

سچ ہے انسان گزرگاہِ جہاں میں نشترؔ

ایسا پیدل ہے کہ جو پا بہ رکاب آتا ہے