کس سے پوچھوں نشاں نہیں ملتا

کس سے پوچھوں نشاں نہیں ملتا

باغ میں آشیاں نہیں ملتا

اس کو ڈھونڈیں تو ڈھونڈنے والے

وہ جہاں میں کہاں نہیں ملتا

اور آگے بڑھیں تو کوئی ملے

ہم جہاں ہیں وہاں نہیں ملتا

گم ہوئے ہم اسی تمنا میں

کیوں تمہارا نشاں نہیں ملتا

کچھ پتہ ہو تو ہم تلاش کریں

بے نشاں کا نشاں نہیں ملتا

تیرے جلوؤں کو دیکھتا ہوں میں

اور تیرا نشاں نہیں ملتا

چھان ڈالا سراجؔ عالم کو

ایک بھی مہرباں نہیں ملتا