مرتے مرتے بھی مرے لب پہ ترانام آیا

مرتے مرتے بھی مرے لب پہ ترانام آیا

شکر صد شکر مرا مرنا مرے کام آیا

درد اٹھا تو تری پرسش پنہاں سمجھے

دل جو تڑپا تو یہ جانا ترا پیغام آیا

حرمت مئے تو ذرا دیکھ حرم سے زاہد

پینے والوں کے لیے جامۂ احرام آیا

خوں بہا کم نہیں یہ حضرت سرمد کے لیے

خون ناحق کا ترے سر جو نہ الزام آیا

کردیا راز محبت خود انہیں نے افشا

جھک گئیں ان کی نگاہیں جو مرا نام آیا

اہتمام اتنا ہے کس کے لیے میخانے میں

ساقی میکدہ باندھے ہوئے احرام آیا

ناز تھا دل پہ بہت اپنے مگر آہ سراجؔ

وہ بھی میدانِ محبت میں کہیں کام آیا