اس زلف گرہ گیر سے تقدیر لڑی ہے

اس زلف گرہ گیر سے تقدیر لڑی ہے

آئی مری اس سال گرہ سخت پڑی ہے

ہم دشت نوردوں میں ابھی ذکر ہوا تھا

خوب آگئے خضر عمر تمہاری بھی بڑی ہے

برگشتہ نصیبی میں کہوں کیا کہ شب وصل

پچھلے سے جگاتی مجھے سونے کی گھڑی ہے

قائم ہے ترے ذکر سے میرا تن خاکی

کلمے کے سہارے پہ یہ دیوار کھڑی ہے

کیا جانے کوئی نان جویں کا مری رتبہ

اللہ سے چھوٹی ہے پیمبر سے بڑی ہے

تنہا صفت زلف نہیں ابر سیہ پوش

روٹی مری ماتم میں سدا منہ کی جھڑی ہے

اے شادؔ سراپا ہے مرصع غزل اپنی

جو لفظ ہے بیتوں میں نگینہ سے جڑی ہے