اب اپنے سائے سے بھی انہیں اجتناب ہے

اب اپنے سائے سے بھی انہیں اجتناب ہے

شاید یہ بدگمانی عہد شباب ہے

کچھ یوں تصورات میں وہ بے حجاب ہے

جیسے اک آفتاب پس آفتاب ہے

اس سے بھی کچھ بلند ہیں میری عقیدتیں

ہر ذرہ آستاں کا ترے آفتاب ہے

ظاہر کچھ اور اس کا حقیقت ہے اور کچھ

دنیا ہے جس کا نام جہان سراب ہے

انسان کا وجود ہے اک پردہ فراق

جب تک میں جی رہا ہوں انہیں بھی حجاب ہے

بھیجا ہے شادؔ اس نے جو خط ہے لکھا ہوا

شاید میرے سوال کا کورا جواب ہے