جلوۂ قدرت نے یوں محوِ تماشہ کردیا

جلوۂ قدرت نے یوں محوِ تماشہ کردیا

دن کو روئے یار شب کو زلف لیلیٰ کردیا

آپ میں ڈوبے تو نورِ معرفت آیا نظر

خود شناسی نے ہمیں اس کا شناسا کردیا

ناز یہ تم کوکہ ہم دل سے عدو کے ہوگئے

فخر یہ ہم کو کہ قسمت نے تمہارا کردیا

کفر میں تو شک نہیں لیکن کہیں کیا واعظو

اک مزا آیا جو اس کافر کو سجدہ کردیا

اے دل بیتاب اتنا بھی تو ان سے پوچھتا

آپ نے کیا کردیا کیا کردیا کیا کردیا

نالہ و فریاد سے خجلت ہوئی کیسی شفیعؔ

آپ نے بیکار راز عشق افشا کردیا