باقی رہا جو راہ طلب میں فنا ہوا

باقی رہا جو راہ طلب میں فنا ہوا

یہ مشت خاک مٹ کے عجب کیمیا ہوا

یہ درد دل مزا ہے کہ اب عمر بھر رہا

یہ عشق خوب ہی مرض لادوا ہوا

مسجد تری کہ بند وہ راتوں میں واعظا

اک میکدہ مرا کہ ہمیشہ کھلا ہوا

کہتے ہیں کس ادا سے وہ دل کی تلاش پر

تھا تو یہیں پڑا کہیں ہوگا پڑا ہوا

کہتے ہو کون چیز قدم سے لپٹ گئی

تم دیکھتے نہیں دل شیدا فدا ہوا

جب آگئی اجل شب فرقت میں اے شفیعؔ

آیا کوئی تو کیا نہیں آیا کیا ہوا