قیامت چھینخ اٹھی چال پر اس فتنہ قامت کی

قیامت چھینخ اٹھی چال پر اس فتنہ قامت کی

ارے ظالم قیامت کی ارے ظالم قیامت کی

بیاں حالت کریں ہم عشق میں کس کس مصیبت کی

کہ محنت ہے سراپا دیکھئے صورت محبت کی

گرانی کوہ سے بھی سخت تھی بار امانت کی

مگر تعریف ہے اے حضرت انسان ہمت کی

وہ اک ظالم وہ اک کافر وہ اک خود بیں وہ اک خود سر

محبت کی ہے ان سے دل نے یا ہم سے محبت کی

اسی خوشبو نے اس کوچہ کے کس دھوکے میں رکھا ہے

صبا لائی وہاں سے یا ہوا آئی ہے جنت کی

یہاں کیا آئینہ میں دیکھتے ہو تم جمال اپنا

تجلی عالم معنی میں دیکھو اپنی صورت کی

نمازیں اور حوروں کے لئے زاہد خدا حافظ

عبادت میں تو پہلے شرط ہے تصحیح نیت کی

ازل ہی سے عجب تمییز حاصل ہے کہ اس دل نے

محبت سے محبت کی عداوت سے عدوات کی

جو آیا موسم گل اڑ چلے صحرا کی جانب ہم

سواری بن گئی باد بہاری پائے وحشت کی

جدھر دیکھا اسے دیکھا جہاں پایا اسے پایا

شفیعؔ اس عالم صورت میں اک کثرت ہے وحدت کی