رہے گا عاشقوں میں نام جب تک آسماں میرا

رہے گا عاشقوں میں نام جب تک آسماں میرا

کریں گے ذکر سو دل سے حسینانِ جہاں میرا

جنابِ عشق کا چرچا جہاں سے مٹ سکے کیونکر

کہ باقی صفحۂ ہستی پہ ہے نام و نشاں میرا

نہ بزمِ نازِ جاناں ہی میں ہے توقیر کچھ میری

نہ دنیائے محبت میں ہے کوئی قدرداں میرا

محبت کس طرح باہم نبھے اب نبھ نہیں سکتی

ادھر بدظن وہ ظالم ہے ادھر دل بدگماں میرا

یہ بصورت دیدۂ تر کی، دل شیدا کا یہ عالم

کوئی غماض ہے میرا، کوئی ہے رازداں میرا

نہیں معلوم وہ صیاد یا جھونکا ہوا کا ہے

چمن میں ڈھونڈھتا پھرتا ہے کوئی آشیاں میرا

کجی ابرو کی، مژگانِ بتاں کی راستی اے دل

کریں گے فیصلہ اک دن یہی تیر و کماں میرا

وہ رہنے کا ٹھکانا مجھ سے کیا پوچھیں گے اے عاشقؔ

علاوہ کوئے الفت کا ٹھکانا ہے کہاں میرا