جلوۂ حسن تو دکھاتا جا

جلوۂ حسن تو دکھاتا جا

حسرتیں دل کی یوں مٹاتا جا

خواب میں آکے تیسرے چوتھے

اپنی صورت مجھے دکھاتا جا

یہی زاہد ہے زیست کی خوبی

خوب رویوں سے دل لگاتا جا

خانۂ دل میں درد بن بن کر

آرزو ہے کہ تو سماتا جا

اپنی زلفِ رسا کے پھندوں سے

مو بمو دل کو تو پھنساتا جا

کیف مستی نہ پوچھ اے ساقی

جام پر جام تو پلاتا جا

راہِ الفت میں اپنی ہستی کو

مثلِ نقشِ قدم مٹاتا جا

بزمِ رنداں ہے جام و مینا ہے

ساقی خوش ادا پلاتا جا

بزمِ اہلِ سخن میں اے عاشقؔ

اپنے اشعار کچھ سناتا جا