puchhte hain mujhse wo akbar tumhein ye kya hua

pūchhte haiñ mujh se vo 'akbar' tumheñ ye kyā huā

koī kah de hai ye bismil aap kā maarā huā

aaj merī hasratoñ ne bhī kiyā mujh ko salām

kaise kaise dostoñ se mar ke meñ tanhā huā

hazrat-e-mūsā haiñ be-ḳhud tuur jal kar ḳhaak hai

be-niyāzī ke karishme haiñ ye dekho kyā huā

qatl kar ke mujh se farmāyā ye hai anjām-e-ishq

kah diyā maiñ ne bhī haañ jo kuchh huā achchhā huā

bhej de is kā banāne vaalā koī ai ḳhudā

ek muddat se paḌā hai dil mirā TuuTā huā

marte dam mujh se judā hotā hai merā dard-e-dil

mujh ko tanhā chhoḌtā hai ye mirā paalā huā

aadmī vo bhī thā kahte the jise fir.aun sab

vo bhī the insān hī jin kā laqab muusā huā

ḳhaak sab kī asal hai fitrat bhī sab kī ek hai

ye hai qudrat jis ko jaisā kah diyā vaisā huā

fitratan the ek ham donoñ magar hukm-e-ḳhudā

vo to rashk-e-gul hue maiñ akbar-e-shaidā huā

puchhte hain mujh se wo 'akbar' tumhein ye kya hua

koi kah de hai ye bismil aap ka mara hua

aaj meri hasraton ne bhi kiya mujh ko salam

kaise kaise doston se mar ke mein tanha hua

hazrat-e-musa hain be-KHud tur jal kar KHak hai

be-niyazi ke karishme hain ye dekho kya hua

qatl kar ke mujh se farmaya ye hai anjam-e-ishq

kah diya main ne bhi han jo kuchh hua achchha hua

bhej de is ka banane wala koi ai KHuda

ek muddat se paDa hai dil mera TuTa hua

marte dam mujh se juda hota hai mera dard-e-dil

mujh ko tanha chhoDta hai ye mera pala hua

aadmi wo bhi tha kahte the jise firaun sab

wo bhi the insan hi jin ka laqab musa hua

KHak sab ki asal hai fitrat bhi sab ki ek hai

ye hai qudrat jis ko jaisa kah diya waisa hua

fitratan the ek hum donon magar hukm-e-KHuda

wo to rashk-e-gul hue main akbar-e-shaida hua