kya batae koi usko ki kahan rahta hai

kyā batā.e koī us ko ki kahāñ rahtā hai

nuur āñkhoñ kā hai āñkhoñ meñ nihāñ rahtā hai

mere hī dil meñ hai mujh se hī nahīñ miltā vo

ruuh ban kar rag-e-jāñ meñ jo nihāñ rahtā hai

saarī duniyā ko tasavvur hai tire aariz kā

har nazar meñ yahī ā.īna nihāñ rahtā hai

mere ashkoñ kī ravānī na rukī roke se

yahī dariyā hai jo har vaqt ravāñ rahtā hai

dam farishtoñ kā ghuTā kyuuñ na zamīñ par utreñ

āsmāñ par mirī aahoñ kā dhuāñ rahtā hai

mujh se kyā pūchhte haiñ aap pata 'akbar' kā

mard-e-āvāra hai kyā jaane kahāñ rahtā hai

kya batae koi us ko ki kahan rahta hai

nur aankhon ka hai aankhon mein nihan rahta hai

mere hi dil mein hai mujh se hi nahin milta wo

ruh ban kar rag-e-jaan mein jo nihan rahta hai

sari duniya ko tasawwur hai tere aariz ka

har nazar mein yahi aaina nihan rahta hai

mere ashkon ki rawani na ruki roke se

yahi dariya hai jo har waqt rawan rahta hai

dam farishton ka ghuTa kyun na zamin par utren

aasman par meri aahon ka dhuan rahta hai

mujh se kya puchhte hain aap pata 'akbar' ka

mard-e-awara hai kya jaane kahan rahta hai