کیا بتائے کوئی اس کو کہ کہاں رہتا ہے

کیا بتائے کوئی اس کو کہ کہاں رہتا ہے

نور آنکھوں کا ہے آنکھوں میں نہاں رہتا ہے

میرے ہی دل میں ہے مجھ سے ہی نہیں ملتا وہ

روح بن کر رگ جاں میں جو نہاں رہتا ہے

ساری دنیا کو تصور ہے ترے عارض کا

ہر نظر میں یہی آئینہ نہاں رہتا ہے

میرے اشکوں کی روانی نہ رکی روکے سے

یہی دریا ہے جو ہر وقت رواں رہتا ہے

دم فرشتوں کا گھٹا کیوں نہ زمیں پر اتریں

آسماں پر مری آہوں کا دھواں رہتا ہے

مجھ سے کیا پوچھتے ہیں آپ پتہ اکبرؔ کا

مرد آوارہ ہے کیا جانے کہاں رہتا ہے