بتوں کا عشق تو دل پر لیا پر اٹھ نہیں سکتا

بتوں کا عشق تو دل پر لیا پر اٹھ نہیں سکتا

اٹھاتے ہیں مگر ہم سے یہ پتھر اٹھ نہیں سکتا

ہمیں پہنچائیں گے پائے تصور اس کے کوچے میں

مثالِ نقش پا گو ضعف سے سر اٹھ نہیں سکتا

جگا کر فتنہ خوابیدہ ٹھوکر سے وہ کہتے ہیں

ہماری چال سے کس طرح محشر اٹھ نہیں سکتا

توجہ سے تیری میخانۂ رنداں میں اے ساقی

صراحی چل نہیں سکتی کہ ساگر اٹھ نہیں سکتا

ہماری ضعف نے یہ دشت میں سکّے بیٹھائے ہیں

بگولہ بھی کوئی اے بادِ صرصر اٹھ نہیں سکتا

فلک نے پاؤں میں ڈالا میرے پھندا قناعت کا

قدم اب گوشہِ عزلت سے باہر اٹھ نہیں سکتا

نزاکت خود دمِ رفتار بسم اللہ کہتی ہے

کمر سے بار گیسوئے معنبر اٹھ نہیں سکتا

غضب ہے تجھ کو نامِ جامۂ عریاں بھی بھاری ہے

تیرا تو ناز اب اے جسمِ لاغر اٹھ نہیں سکتا

میرا خط کس طرح اے آسماں منزل تجھے پہنچے

پر جبریل سے یہ غم کا دفتر اٹھ نہیں سکتا

تقاضہ ہے یہ جلا دی کا مقتل کس طرح چلئے

نزاکت کہہ رہی ہے یہ کہ خنجر اٹھ نہیں سکتا

حریصان جہاں ہر چند چاہیں لے نہیں سکتے

مرے دم تک مرا رزقِ مقدر اٹھ نہیں سکتا

ہمارے قتل کو تیغِ نگاہِ ناز کافی ہے

یہ مانا ہم نے قاتل تجھ سے خنجر اٹھ نہیں سکتا

فقیری تیرے کوچے کی کہیں بہتر ہے شاہی سے

تیرے دولت سرا سے مر کے قیصرؔ اٹھ نہیں سکتا